Shtetet e Bashkuara dënuan përshkallëzimin e fundit të dhunës në kufirin midis Armenisë dhe Azerbajxhanit.

“U bëjmë thirrje Armenisë dhe Azerbajxhanit që t’i respektojnë angazhimet e tyre për armëpushim, duke ndërmarrë hapa të menjëhershëm për qetësimin e situatës”, tha zëdhënësi i Departamentit amerikan të Shtetit, Ned Price.

“Tensionet e vazhdueshme përgjatë kufirit Armeni-Azerbajxhan nënvizojnë faktin se vetëm një rezolutë gjithëpërfshirëse, që i adreson të gjitha çështjet e pazgjidhura, mund t’i normalizojë marrëdhëniet midis dy vendeve dhe të mundësojë njerëzit e rajonit të jetojnë së bashku në mënyrë paqësore”, tha Price.

Armenia tha të mërkurën se forcat e Azerbajxhanit vranë tre ushtarë të saj në kufi.

Ministria e Mbrojtjes e Azerbajxhanit tha se njësitë e Forcave të Armatosura të Armenisë hapën zjarr në pozicionet e trupave azerbajxhanase, të vendosura në rajonin Kallbaxhar, duke plagosur dy ushtarë azerbajxhanas.

Të dyja palët akuzuan njëra-tjetrën për rritjen e tensioneve.

Dy vendet, vitin e kaluar, kanë luftuar gjashtë javë për rajonin e Nagorno Karabakut.

Ky rajon njihej ndërkombëtarisht si pjesë e Azerbajxhanit, por kontrollohej nga armenët etnikë qysh në fillim të viteve 1990.

Rreth 6,000 njerëz janë vranë në luftimet e vitit të kaluar, që kanë përfunduar me një marrëveshje armëpushimi të ndërmjetësuar nga Moska.

Sipas marrëveshjes, një pjesë e Nagorno Karabakut dhe të shtatë rrethet përreth tij janë vendosur nën administrimin e Azerbajxhanit, pas gati 30 vjetësh nën kontrollin e forcave etnike armene./REL/